يوميات مواطنن عالفاتورة .. - فواز خيو

16:40 28-05-2022

اتصلت بي وهي غاضبة حزينة و تولول . شو يعني تولول ؟ ما بعرف لكن هيك كانت . هدأت من روعها ، شو يعني روعها ؟ ما بعرف خلص . تطلب المساعدة والنصح . خير يا صديقتي ؟ قالت : ابني ترك الجامعة وسيذهب الى العراق ليشتغل في مطعم . سألتها : كم سيعطونه راتب ؟ قالت : 500 دولار والسكن والطعام عليهن . قلت لها : خليه يأمنلي فرصة بالمطعم بحياتك . سكتت ، قلت لها ؛ عيشي انتي وابوه ب 20 دولار . صديقة ميسورة كنا جالسين في كافيه نشرب القهوة ، قالت لي : معارفك كثيرة حولك شي صبية او امرأة تشتغل عندي في البيت كمقيمة . سألتها : قديش ممكن تعطيها ؟ قالت لحد 200 ألف بالشهر . قلتلها : بتشغليني إلي وبظل عندك بالبيت ؟ هههههه .. البارحة اشتريت قنينة زيت ب 17 الف ، ولم أتجرأ على شراء كيلو سمنة ب 17 ، تصرف ثلث راتبك سمنة وزيت وما بظل معك تشتري شي تطبخو . بس الوضع كويس وفعلا الراتب بكفي لو عرفنا نتدبر امورنا . هيك صرح مسؤول مالي كبير ، والمسؤول طبعا لا يكذب ولا تخطئ ارقامه ، لكن نحنا المواطنين فايتين بالحيط ، ومن كثرنا سوينا زحمة عالحيط وصار الحيط يلق ويروح هيك وهيك ، ولو وقع الحيط رح يدفعونا ثمنو . المهم يا قلبي كنت محظوظ هاليومين فعلا ، اجت رسالة الغاز ورحت بموكب مهيب جبت القنينة ، ورسالة الرز ورسالة البنزين . بس أنا ما بحب احكي لأن العين بتاخذ عليي . كانو يقولو : العين بتاخذ مداها من الحجر . انا خبير طاقة وبعرف . ولازم اليوم تجيني رسالة أفضل رسالة هي رسالة الهرم أو الفؤاد . اي نحنا بلد الرسالات .