لو ألله يبعثلي امرأة تتزوجني وبعد ما تمارس معي العنف الزوجي قيم ضدها دعوة وإربح 15 مليون دولار . ولك 10 مليح . كان جوني ديب حزين وهو عبيحكي قبل الحكم . ثروتو 650 مليون دولار ، قال : حياتي انتهت . ههههه نحنا بسوريا هلق بدأت حياتنا ، وبس تجينا شي رسالة للبنزين او السكر أو الغاز بتسمع جوفياتنا للأردن . جميل تكون لقمتك صغيرة واحلامك صغيرة ، بتكون انت مرتاح والحكومة مرتاحة ، والاعداء مغتاضين . الكازية مثلا بتعطيك تنكة البنزين 17 ليتر ، ونصو غاز ز يعني التنكة بتمشيك 100 كيلو بدل 200 ، يعني عبتشتري البنزين بسعر مضاعف ، ووقت بتحتاج بتاخذ عن البسطات البنزين المغشوش بماء اليانسون او الكمون ، وبتصير السيارة مثل العنزة تعطس وت... ط . صار عندك برنامج انك تفك الكربرتير مرتين بالشهر لأنو بسطم من الوسخ . بغياب القانون والحساب عليك تتوقع كل شي . اشتريت مبارح كيلو البرغل ب 6000 ليرة . طيب الدولة عبتاخذ كيلو القمح من الفلاح ب 2000 ليرة فقط . معقول أجرة طحنو 4000 ليرة ؟ كلو جحيم عالمنتج وهيك قصة التفاح والعنب والفروج وغيرو تاجر سوق الهال وهو قا على مؤخرتو وعبدخن سيكارة بيربح أضعاف الفلاح اللي تعب موسم كامل . ما في قانين تحمي المنتج ، لهيك تخربت وتهاوت كل وسائل انتاجنا . كلو مجير لصالح الحيتان . وبيستوردو منتوجات من برا وبيربحو بالاستيراد والتصدير ، وانت بتربح تحليلات جديدة وشعارات جديدة . المهم عبفكر اتقدم لخطبة آمبر واستفزها لعل تعملي قتلة وإرفع دعوة عنف زوجي واكسب كام مليون دولار . بس رح اطلب يحولوهن عالسوري حتى ما أتهم بالتعامل والإتجار بالعملة الصعبة . ولا خلص بقلها تعالي لهون بنتزوج وبتعمليلي قتلة وبنروح سوا على أمريكا . كل مشكلة وإلها حل . فقط عنا بصير حل المشكلة بمشكلة أكبر . سيدة آمبر بحبك تعالي تجوزيني