ما في أجمل من انك تكون بحالة يأس او حزن أو ضياع ، أو مخلوطة يعني مش عارف شو بسموها ، وتتلقى أخبار لطيفة ظريفة تعيد بقايا الأمل عندك . آخر الأخبار ان مدير الدفن عبأكد من خلال النافذة الذكية انهن أنجزو 4000 قبر ومقبرة عدرا صارت جاهزة . يعني اللي حابب يموت ما عاد في حجة تخليه يماطل . حتى والله عبأكد على انو الخدمة المتوفرة محترمة . يعني الميت ما بمل ، وممكن في صالات سينما وترفيه ولعب شدة كمان . شي بخلي الواحد يحب يموت ليجرب أجمل الخدمات والإنجازات والإبتكارات . وبس ينهو تمويت عفوا تخديم الأموات بشكل كامل وتأمين مستقبلهن ، أكيد رح يلتفتو للأحياء ويشوفو شو علتهن وليش ما كاين شي يعجبهن . لكن ما أعلنو عن سعر القبر وكل درجة شو سعرها ، يعني قبر سوكة وواجهة مش مثل قبر حشوة ، بيختنق الواحد فيه وبموت فعلا . خايف اذا الأموات كانو مبسوطين بالمقبرة ما يسمحو لحدا يفوت لعندهن ، حتى ما يشاركهن ، والأسوأ انهن يحاولو يمنعونا نموت . فعلا شي بطقق وبموت .